Bidasoan ere aurrera darraite aldundiaren Partaidetza Aurrekontuen batzarrek. Ekainean hiru batzar egingo dituzte Irun eta Hondarribia artean. Bi milioi euro zertan inbertitu erabaki dezakete bidasoarrek.
Aurreko Partaidetza Aurrekontuen egitasmoko saio bat
Gipuzkoako Foru Aldundia Partaidetzako Aurrekontuen egitasmoa garatzen ari da herrialdean, eskualdez eskualde. Bidasoan ere badaude horren gaineko parte hartze saioak, nahiz eta aldundiaren arabera, Irunen arazoak egon bilkurak egiteko tokiekin. Hala, ekainaren 16 eta 18an Irunen egingo dituzte tailerrak, eta 15ean Hondarribian. Herritarrek bi milioi euro zertan inbertitu proposatu eta erabaki dezakete egitasmoaren bidez. Beheko zerrendan daude tailerren xehetasunak.
Zuzenean bakarrik ez. Tailerretara joan ezin dutenek, euren proposamenak helarazteko aukera badute. Horretarako
webgune bat nahiz buzoiak erraztuko ditu aldundiak Irunen eta Hondarribian. Irunen, hainbat elkartetan jartzen ari dira buzoi horiek, eta Hondarribian, honako tokietan: udaletxea, kiroldegia, arraun elkartea, anbulatorioa eta turismo bulegoa.
Aldundiak esan duenez, prozesu hau Irunen zenbait auzo elkarte eta beste eragile batzuri esker ari dira aurrera eramaten. Hondarribian udalaren laguntza jaso du egitasmoak.
Ondokoak dira ekainerako prestatu dituzten tailerrak, proposamenak helarazteko prozesukoak; uztailean egingo diren bilkuretan erabakiko da zein egitasmori lehentasuna eman, hau da, bi milioi horiek datozen lau urteetan Bidasoan zertan inbertitu.
- Irungo tailerrak: ekainaren 16an, 19:00etan, Lakaxitan; ekainaren 18an, 19:00etan, Caritasen egoitzan (Jose Egino 9-10, atzealdea).
- Hondarribiko tailerra: ekainaren 15ean, 19:00etan, Kultur Etxean.
