Bonberenea txarangak Kultur Etxea okupatuko du ostiralean

Bihar ez da gaur aurkeztera dator Bonberenea txaranga Hondarribira. Zazpi kanta propio eta DUTen moldaketa bat jasotzen du diskoak. Estilo berriak jorratu dituzte, "txaranga bat ulertzeko era berri bat".

Asier Perez-Karkamo

Hondarribia

2015/06/03

Ezagutzen ez dituenak, ezustekoa hartuko du

Tolosako Bonberenea gaztetxetik sortutako txarangak Hondarribiko Kultur Etxean joko du ostiralean, Bihar ez da gaur diskoa aurkezteko. 20:00etan hasiko da emanaldia eta sarrerak 3 euro balio ditu. Kontzertu berezia izango da, izan ere, zortzi abesti grabatu dituzte disko berrirako, zazpi konposizio propioak, eta beste bat DUT taldearen moldaketa bat. Tolosarrek azaldu dutenez, txarangaren garapena jaso dute Bihar ez da gaur diskoan. “Garapena da talde honen ezaugarri nabarmenenetako bat, eta garapenak biharkoa gaurkotzea eskatzen du askotan, nahiz eta erotzat hartua izatearen arriskua dagoen. Pena eta lotsa, ausartaren kondena”. Sortu zenetik txaranga ausarta izan da Bonberenea, baina labetik atera berri den diskoan harago joan dira. Egituraz beste edozein txarangaren tankerakoa bada ere, etxe okupatu baten fruitua da Bonberenea, eta horrek isla du bere izaeran, eta diskoan ere izan du. “Txaranga bat ulertzeko era berri baten aurrean gaude”, onartzen dute beraiek. Eta ostiralean aurkeztuko duten lana horren adibide da: “Ez kalejirarik, ez fandangorik, ez habanerarik… Itsaso berrietan igerian, estilo berrien beldurrik gabe”, asmo horrekin okupatuko dute Tolosaldekoek Hondarribiko Kultur Etxea ostiralean.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.