Rubio hirukoak Banakon joko du larunbatean, diskoa helburu

Jon Sanchezek gidatzen duen Rubio taldeak diskoa finantzatzeko kanpaina abiatu du. Apirilan zazpi abesti grabatu zituzten eta udarako kalean egotea nahi dute, CD-digipack formatuan. Larunbatean Banakon joko dute, Boogie Van oreretarrekin batera.

Asier Perez-Karkamo

Hondarribia

2015/06/02

Jon Sanchez ‘Rubio’

Jon Sanchez Rubio abeslari eta musikari hondarribiarrak gidatzen duen Rubio hiruko akustikoak lehen diskoa argitaratu nahi du aurten, eta gastuak finantzatzeko kontzertua emango du larunbatean Banako tabernan. Ez da bakarrik egongo. Errenteria-Oreretako Boogie Van rock taldeak ere joko baitu. Kontzertua 22:00etan hasiko da eta sarrerak 5 euro balio ditu. Hiruko formatuan ari da azkenaldian Sanchez, Antonio Cañamero eta Ander Garciarekin. Hirurek gitarrak jotzen dituzte, Sanchezek akustikoa eta Cañamerok eta Garciak elektrikoak. Urtarrilaren 3an ere modu horretara igo ziren Banakoko taulara, Ainara Oskozen erakusketaren inaugurazio ekitaldian saio txiki gozo bat eman baitzuten. Baina igandekoa kontzertu berezia izango dela jakinarazi du taldeak, eta laukote gisa ariko direla, Carlos Zubikoa baxu jotzailearekin (Lurra, Sagarroi…). Diskorako prestatzen ari diren abestiak joko dituzte, baita zahar batzuk ere. Diskoa ateratzeko crowfunding kanpaina abiatu du Rubio taldeak: “Apirilan grabatu ditugun zazpi abestiekin CD-digipack bat argitaratu nahi dugu, eta ekaina eta gero bertsio digitalean”, azaldu du Sanchezek. Hilaren 14an amaitzen da funtsak lortzeko kanpaina hori eta nahiko aurreratuta doa, baina gutxieneko dirua gainditzen bada, diskoaren kalitatean eragingo du horrek.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.