Abotsanitz "udaleko ateak irekitzera" konprometitu da

Abotsanitz ezker abertzaleko alderdiak hauteskunde kanpainako ekitaldi nagusia egin zuen atzo arratsaldean Gipuzkoa plazan. Ortzi Alonso alkategaiak "herriko politika berritzeko apustua" direla nabarmendu zuen.

Asier Perez-Karkamo

Hondarribia

2015/05/22

Ortzi Alonso, Gipuzkoa plazako ekitaldian

Abotsanitz ezker abertzaleko alderdiak hauteskunde kanpainako ekitaldi nagusia egin zuen atzo arratsaldean Gipuzkoa plazan. Dozenaka jarraitzaile elkartu ziren bertan eta antolatzaileek musikaz girotu zuten ekitaldia. Hizketaldiak hasi aurretik haurrek mural bat prestatu zuten, horretarako propio prestaturiko proiekzio batzuk baliatuz. Ortzi Alonso alkategaiak eta Estitxu Urtizbereak mikrofonoa txandakatu zuten Abotsanitz taldearen programako ildo nagusiak azaltzeko, baina zerrendako eta zerrendatik kanpoko beste kide batzuen laguntza eskatu zuten tarteka, gaikako azalpenak emateko. Alonsok, Abotsanitz “herriko gertakarietan inplikatu nahi duen mugimendua” dela adierazi zuen: “Mugimendu parte hartzailea da, herri batzarraren babesarekin ezker abertzalearen eginkizunekin jarraitzen duena, eta herriko gertakarietan parte hartzen jarraitu nahi duena, orain arte egin dugun bezala”. Udal hauteskundeetara aurkezteko erabakia hartu zutenetik “ilusioa piztu” dutela erantzi zuen: “Herriko politika berritzeko eta gaztetzeko apustua gara, gauzak beste modu batera egiteko tresna, ezker abertzalearen irekiera”. Eta igandetik aurrera, udaleko ateak zabalduko dituztela gaineratu zuen Abotsanitzen alkategaiak, “herritarrek ahotsa izan dezaten, udal batzarretan eta batzordeetan parte hartzeko aukera izan dezaten, udal zerbitzuak herritarrei gerturatuz eta auzolana bultzatuz, lan egiteko tresna erreal eta solidarioa dela sinisten dugulako”.

Gaur, triki poteoa

Gaur itxiko du hauteskunde kanpaina Abotsanitz alderdiak, 19:00etatik aurrera Zumarditik abiatuko den triki poteoarekin.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.