Lurrazaleko aparkalekuen alde dago Irungo EAJ

EAJ alderdiaren ustez, hiriaren erdigunea trafikoz arindu beharra dago

2015/05/19

Plaiaundiko sarreran egin du gaur agerraldia Iridoyk.

Aparkalekuen gaia EAJren hiri proiektuaren “ardatz nagusienetako bat” da, gaur Xabier Iridoy zerrendaburuak adierazi duenez. Horregatik, proposamen zehatza adierazi du: lurrazaleko aparkalekuen alde egin du EAJk. Bukatzear den legealdian horren alde aritu dela lanean adierazi du alkategaiak, eta hainbat auzotarako proposamenak egin dituzte. Izan ere, jeltzaleen ustez, lur azpiko aparkalekuetarako plaza bat erostea “zaila” da familia irundarrentzat. Lurrazaleko aparkalekuen inbertsioa urte gutxiren buruan amortiza daitekeela uste du EAJk. Eta jardun zehatzen artean, Anzaran auzoan, Plaiaundi Institutuaren parean dagoena hobetzea eta handitzea nahi du EAJk. Trafikoaz ere mintzo da gaur Iridoy. Erdialdeko trafikoa arintzearen alde egin du, “horretarako bide alternatiboak eskaini behar ditugu”, eta ildo horretan hegoaldeko saihesbidea eta A-8arekin hirugarren lotura aldarrikatu ditu, “Gipuzkoako Foru Aldundiarekin elkarlanean”. GI-636 errepidearen bikoizketa bultzatuko duela esan du aldi berean, “Plaiaundi Institutuaren eta Zubimuxuko biribilgunearen arteko zatiari lehentasuna emanaz”, eta gainera, Katea-Behobia A-8aren zatian ordainsaria kentzea proposatu du. Mugikortasunarekin jarraituz, hiriko puntu ezberdinak lotzeko modu bezala bidegorri sarea osatzea proposatu dute jeltzaleek, eta bestalde, merkataritza jarduera dagoen guneetan zirkulazio ordutegia egokituko duela agindu “aparkaldi espresa” modalitatea jarriz. Artia-Ibarla eta Blaiako hilerrira doan bidearen arteko loturan biribilgunea nahi du EAJk. Barrera arkitektonikoak kentzeko lan egingo duela agindu du hein berean Iridoyk.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.