Energia berriztagarrien alde egin du koalizioak, eta fracking-aren kontra irmo agertu da

Irabaziko kideak, fracking-aren eta TTIP-aren kontrako kartelekin
Fracking-aren kontra, energia nuklearraren kontra; eta energia aurrezpenaren, efizientziaren eta energia berriztagarrien alde dago Irabazi Irun. Eta eredu hori Irunen ezarri nahi du. Hori hauteskunde kanpainaren barruan koalizioak eman duen agindua, energia ereduaz hitz egin duenean.
Izan ere, Irabazi Irunen ustez, “egoera globalak” eskatzen du beste energia eredu baten alde egitea, “iraunkorra”. Horrela, “hidrokarburoetan oinarritutako eredua” albo batera utzi, eta energia berriztagarrien alde egin du taldeak, “eta zentzu horretan ez dugu inolako anbiguotasunik onartuko”.
TTIParen kontrako hitzak ere izan ditu Irabazi Irunek. Ameriketako Estatu Batuek eta Europako Batasunak Inbertsio eta Merkataritzarako ituna da TTIP; herrialde hura eta Batasuna negoziatzen ari omen dira akordio hori. Hala, akordioa “herritarren bizkarrera” negoziatzen ari direla esan du Irabazi Irunek, eta horrek erakunde publikoetan, zerbitzu publikoetan eta bestelako alor publikoetan “eragin kaltegarria” izango duela uste du koalizioak. Horrela, Irun TTIPari intsumiso deklaratzea eskatuko du koalizioak.