Irungo EAJ, gizarte zerbitzuak auzoetara hurbiltzearen alde

Arreta pertsonalizatu eta hurbilaren aldeko apustua egin dute jeltzaleek

2015/05/11

Xabier Iridoy, gaur, Ama Xantalen adinekoen egoitzan

Arreta pertsonalizatu eta hurbila, eta auzo guztietan. Hori da gizarte zerbitzuen alorrean Irungo EAJk duen proposamena traza handitan. Pertsonen ongizatearen alde lan egiten dutela adierazi du Xabier Iridoy zerrendaburuak, “eta ongizatea norberaren autonomia pertsonalean hasten dela deritzogu, ondoren bere familia eta ingurunera zabaltzeko”. Hartara, gizarte zerbitzuak auzoetara hurbiltzeko ahalegina egingo duela adierazi du Iridoyk. Eta erakundeen arteko lana garrantzitsu eman du EAJren buruzagiak, “eskualdean adineko pertsonentzako plaza gehiago hitzartzeko, eta egoerak hala eskatuko balu, Irunen egoitza berriaren eraikuntza sustatuko dugu”. Aldi berean, etxez etxeko laguntza zerbitzua indartzeko konpromisoa hartu du EAJk. Belaunaldi ezberdinen arteko harremanez ere mintzo da gaur, Ama Xantalen adinekoen egoitzan egin duen agerraldian, Iridoy. Haren ustez, boluntarioen jarduerak, asoziazionismoa eta komunitatearen parte hartzea babestuz, belaundaldien arteko loturak indartu egin behar dira, hiri kohesioa bultzatzeko. Bide horretan, Jaurlaritzak aurrera daraman Euskadi Lagunkoian Irun ere egotea beharrezkotzat eman du. Baina behar guztietara iristeko gizarte alorrean, hirugarren sektorean gizarte alorrean Irunen lanean dabiltzan eraagileekin “etengabeko elkarlana” bilatu behar dela esan du EAJren alkategaiak, “erakundeen gaitasuna mugatua baita gizarte politiketan dauden behar eta eskaera guztiei erantzuteko”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.