Udal artxiboa Egiluz jauregian bateratu eta Kultur Etxean erakusketa aretoa berreskuratu nahi ditu alkategai jeltzaleak. Udal azpiegituren erabilera arautzeko asmoa azaldu du Sagarzazuk.
Hautagai jeltzaleak, Egiluz jauregiaren aurrean
“Ditugun kultur ekipamenduen mapa osatu behar dugulako”, udal artxiboa jasoko duen Egiluz jauregiaren aurrean kultura eta ondare arloetarako dituen asmoen berri eman du
Txomin Sagarzazu alkategai jeltzaleak astelehen goizean. Aitor Kerejeta alkatea, eta EAJren zerrendako bigarrena, laugarrena eta bosgarrena izan ditu ondoan, hurrenez hurren, Juan Mari Altuna, Maria Serrano eta Kalixa Silanes.
Egun, bi tokitan banatuta dago udal artxiboa, Panpinot Jauregian zati bat, eta Kultur Etxeko biltegian bestea. Sagarzazuk artxiboa bateratzeko asmoa azaldu du, eta Juan Laborda kaleko eraikina leku ona dela uste du: “Biltegia egokitzea beharrezkoa ikusten dugu, eta azken urteotako bideari jarraituz, Hirigune Historikoan izatea nahi dugu, ahal dela udaletxetik hurbil. Hori horrela eginez gero, erakusketa gela berreskuratuko genuke Kultur Etxean”, Denda kaleko eraikinaren proiektuan erakusketa aretorako diseinatu baitzen egun artxiboa jasotzen duen aretoa.
Alkatetza lortuz gero, kultur azpiegituren “mapa osatzearekin batera”, eraikin guztien funtzionamendua arautuko lukeen plan bat eratzeko asmoa azaldu du Sagarzazuk.
Ondarea “gizarteratzen segitzeko” asmoa
Hauteskunde programako kultura eta ondare arloak aurkezteko ekitaldian, herritarrak protagonista izatea nahiko lukeela adierazi du alkatetzarako hautagai jeltzaleak: “Eragile nagusia herritarrak izan behar du, ez gara beti kanpora begira ari, gure ustez, lehen lana izan behar da herritarrek ondarearekin lan egitea eta ondareaz gozatzea”.
Bide horretan, Hondarribiko EAJren apustua Arma Plaza Fundazioaren bidez ondarea “gizarteratzen segitzea” dela erantsi du, herritarrengandik hasi eta bisitariekin segituz: “Herriko ondarea nazioartean kokatzeko ahaleginetan ari gara ere” eta ondareen foroarekin segitzeko konpromisoa azaldu du Sagarzazuk.
