Mangaren, komikiaren, eta oro har, japoniar kulturaren zaleek hitzordu ekidiezina dute asteburu honetan Ficoba erakustazokan, Irunen eta Euskal Herrian geldialdia egingo baitu lehen aldiz Expotaku birak.
Almeriako Expotaku azokaren irudia
Japoniar kultura gertutik ezagutzeko parada izango dute mangaren, animazioaren,
cosplay-aren eta bideojokoen zaleek asteburuan Ficoba erakustazokan, Expotaku biraren eskutik. Lehen aldiz geldialdia egingo du erakusketak Irunen eta Euskal Herrian, eta 2.000 metro koadroko azaleran 26 erakusketari biltzeaz gain, jardueraz betetako egitaraua eskainiko dio erakustazokara hurbiltzen den lagun orori.
Gipuzkoan tankera honetako azoka bat antolatzen den lehen aldia dela azaldu du David Gaspar Expotaku biraren zuzendariak. “Gauza txikiak egin izan dira Gasteiz inguruan, eta oso handiak, aldiz, Bizkaian, baina Gipuzkoan momentura arte ez da halakorik egin”, kontatu du arduradunak. Antolakuntzaren filosofiaren arabera, erakusketa handi guztiak ez dira zertan hiriburu handietatik igaro behar, “eta egia esan, Gipuzkoa aukeratu genuen batez ere herritarrek hala eskatu zigutelako”.
Hori horrela, parte hartuko duten erakusketarien artean presentzia euskalduna dagoen arren, ordezkaritza bidasoarra ere izango da bertan, esaterako, Judas Arrieta artista hondarribiarrak diseinatutako skate oholak ikusi ahal izango dira, edota Tinta Comics denda irundarrak antolatutako jardueretan ere parte hartzeko aukera izango dute interesdunek.
Hala, bihar 10:00etatik 21:00etara zabalik egongo da azoka, eta etzi 10:00etatik 20:00etara. Egun baterako sarrerak bost euroko kostua izango da eta bi egunerako abonamenduak aldiz, zortzi eurokoa.
Azokaren programa osoan
bertan ikus daiteke [egitaraua soilik gazteleraz].