2008an egindako diagnosiaren ondorioz euskararen erabilera sustatzeko zenbait helburu finkatu zituen klubak eta "horiek denak" bete dituztela jakinarazi dute.
Goizeko agerraldia. Ezkerretik eskuinera: Sodupe, San Martin, Sodupe eta Eguzkitza
izenburupean, euskararen diagnosia klubean eta horren erabilera bultzatzeko helburuak aurkeztu zituen talde irundarrak 2008an. Horren balantzea aurkeztu dute gaur goizean Jose Angel Sodupe klubeko presidenteak, Aritz Sodupe euskara arduradunak, Fernando San Martin Irungo Udalaren Euskara delegatuak eta Iban Eguzkitza Euskara Arloko zuzendariak.
Sodupe klubeko euskara arduradunaren esanetan, helburu “horiek denak” bete dira eta balantzea beraz, positiboa da. “Taldeko eragileen euskararekiko motibazioa eta sentsibilizazioa landu da”, adierazi du, “haur eta gazteek parte hartzen duten jardueretan euskararen erabilera bermatzen da, harrobiko taldeetan eta oinarrizko kirol jardunean euskararen erabilera sustatzen da, bulegoko lanez arduratzen diren langileak euskaraz badute gaitasun aski, klubaren irudi korporatiboan eta hizkuntza-paisaian euskararen presentzia bermatzen da eta, oro har, Bidasoa Kirol Elkarteko idatzizko eta ahozko harremanetan, euskararen presentzia bermatzen da”.
Ildo horretan klubeko kirol arduradunak orain arte aurrera eramandako jarduera eta ekintza planaren berri eman du; baita batzorde berriak egindako “ahalegina” nabarmendu ere, “barne funtzionamendua euskalduntzen eta harrobiko taldeetako hizkuntz diagnosi zehatzetatik abiatuta euskararen erabilera indartzeko estrategia zehatzak definitzen”.
Hori horrela, oinarrizko kirola, eskola kirola eta udako campusa euskara hutsez bideratzen direla azpimarratu du Sodupek. Halaber, klubaren agerraldi eta jarduera publikoetan “euskararen presentzia ere zaintzen dela” ziurtatu du.
Urrats bat “harago”
Bidasoa Eskubaloi Klubak egindako balantzearen barruan, aurrera begira euskararen erabilera sustatzeko martxan jarri nahi dituen jarduera eta ekintzen berri eman du klubeko euskara arduradunak. Izan ere, “harago” joan nahi dutela aurreratu du Sodupek eta horretarako, besteak beste, ondoko neurriak hartuko ditu: “Lehenengo taldeko jokalarientzat euskara eskolak, euskaraz prestatutako eskubaloiaren hiztegi terminologikoa berandu baino lehen klubaren web orrian zintzilikatuko dugu, web orria bera elebidun izateko urratsak egingo dira eta ereserkia euskaraz ere jartzea aztertzen ari da zuzendaritza”.
