Iritsi da 'goitiburu' olinpikoa
Larunbatean goitibeheren aurkezpena egingo dute eta igandean jaitsiera
Bihar goizean egingo dute Hondarribiko IX. Herri Olinpiadetako —garai berriko II.ak— bosgarren jardunaldiko proba esperatua, goitibeheren jaitsiera. Taldeak aspalditik ari dira proba hau prestatzen, eta ilusio berberarekin espero da ibilgailuen aurkezpena, gaur arratsaldean San Pedro kalean egingo dena.
17:00etan izango da aurkezpena eta ondoren txaranga poteo olinpikoa egingo dute Portuan. Jaitsiera, aldiz, institutuko maldan egingo dute bihar, 09:30etatik aurrera. Hortaz, gaur dute azken eguna 36 taldeek bertan entrenamendu saioak egiteko.
Eta adi egon arratsean, aurkezpenaren ondoren goitiburu olinpikoaren prebia ‘serioa’ publikatuko baitu HITZAk olinpiadetako webgune berezian. Bertan, taldeen gotibeheren argazkiak publikatu eta biharko proba burutzeko dauden arazo juridikoak azalduko ditugu.
Beheko bideoan garai zaharreko olinpiadetako jaitsiera bat ikus daiteke, Alde Zaharrean egiten zenekoa. Eta gogoratu, olinpiaden inguruko informazio guztia webgune berezian aurkitu daiteke, eta argazkiak, bidasoa.hitza.eus webguneko Irudiak atalean.
