Arraun elkarteak hauteskunde prozesua abiatuko du ostiralean
Ohiko batzarra egingo dute 19:00etan, eta ez ohikoa 20:30ean. Hauteskunde prozesua abiatu eta iazko kontuak onartuko dituzte, besteak beste.
Ostiralean, hilak 20, hauteskunde prozesua abiatuko du Hondarribia Arraun Elkarteak (HAE), 20:30ean deituta dagoen ezohiko batzarrean. Aurretik beste batzar bat egingo du HAEk, ohikoa, eta bertan, besteak beste, iazko ekitaldiko kontuak onartuko dituzte.
Gainera, iaz egin bezala, aurrekontuaren %30era iristiko litzatekeen mailegu-eskaera egiteko baimena eskatuko du zuzendaritzak. Tramite horrekin, “denboraldian zehar diru beharra izango balitz, konpontzeko” aukera aurreratu nahi dute HAEko agintariek. Ohiko bilera 19:00etarako deitua dago, lehen deialdian, eta ordu erdi geroago, bigarrenean.
Bigarren batzarra, ezohikoa, 20:30ean da, eta puntu bakarra landuko dute, Lehendakaria eta Zuzendaritza Batzordea aukeratzeko hauteskunde-prozesuari hasiera ematea. Bazkideek oniritzia emango balute, hauteskunde egutegia eta Hauteskunde Batzordea zehaztuko dituzte ostiralean.
HAEren azken bazkide kanpainaren aurkezpena
