Xakeko Ohorezko Mailako taldeak 2-2 berdindu du liderrarekin eta 8. postuari eutsi dio. B taldeak lortu du Marlaxkakoen asteburuko garaipen bakarra.
Ohorezko Mailakoak, larunbatean
Bosgarrenean ere ez. Hondarribia-Marlaxka elkarteko taldeek ez dute nahi bezala hasi Gipuzkoako xake liga eta bosgarren jardunaldian ere denetarik izan zuten, garaipen bat, bi berdinketa eta beste bi porrot.
Hiru izan ziren Kasino Zaharrean jokatu zuten herriko taldeak, Ohorezko Mailakoa, eta Hirugarren Mailako bi ordezkariak. Lehen taldeak partida zaila zuen, lider Iriondoren kontra, baina 2-2ko emaitza lortu zuten hondarribiarrek zarauztarrekin.
Marlaxka Dk ere bere multzoko lehenengoa izan zuen aurkari, Errenteria-Oreretako Fomento B, baina ez zuen hainbesteko zoririk eduki, eta 0-4 gailendu ziren Sustapenekoak: “Partidetan ikusitakoaren baitan, zigorra handiegia izan zela ezin uka”, argitu du Marlaxkak.
E taldeak berdinketa lortu zuen, Gros Hren kontra. Gipuzkoako etorkizun handiko lau emakumek osatzen dute Gros H, eta haien kontra Marlaxkak “merituzko berdinketa” eskuratu zuen. Hondarribiko taldean ere neska batek jokatu zuen, Julia Urrozek, eta bere partida irabazi zuen gainera.
Ligan neskekin aritu ohi den talde bakarretakoa da Hondarribikoa. Lurraldeko ligetako multzo guztiak kontuan izanik, sei emakume baino ez ziren asteburuan lehiatu, Urroz eta Gros Hko laurak Hirugarren Mailan, eta Iriondo Bko ordezkari bat, Bigarren Mailan.
Beste biek kanpoan
Lehen eta Bigarren mailetako taldeek kanpoan jokatu zuten. Marlaxka Bk garaipena lortu zuen Andoainen, eta C taldeak ia-ia ezustekoa eman zuen Billabona B liderraren kontra, baina azkenean galdu egin zuen, alde txikienagatik izan bazen ere.
Hortaz, gauzak ez dira ondo hasi Marlaxkarentzat ligan, baina oso gaizki ere ez: “Emaitza hauek onegiak ez badira ere, gure talde guztiek beren sailkapenetan erdiko postuetan daude egun”, erantsi du elkarteak.
Marlaxkako taldeen emaitzak
Gipuzkoako Preferente Maila
- Hondarribia Marlaxka A-Iriondo A 2-2
Lehen Maila
- Andoain-Hondarribia Marlaxka B 1,5-2,5
Bigarren Maila
- Billabona B-Hondarribia Marlaxka C 2,5-1,5
Hirugarren Maila
- Hondarribia Marlaxka E-Gros H 2-2
- Hondarribia Marlaxka D-Fomento B 0-4
