Garaipen zabala eskuratu du Irun RT-k Uribealdearen kontra
Sailkapen orokorreko bigarren taldearen aurka lehiatu arren, 31-5 irabaztea lortu du talde irundarrak
Uribealdea KE taldearen aurka lehiatu zen Irun RT asteburuan, Plaiaundin finkatutako partidan. Talde bizkaitarra sailkapen orokorraren bigarren postuan kokatuta egon arren, 31-5eko garaipen zabala eskuratzea lortu zuen bertako taldeak.
Partida hasi eta zortzi minutura lortu zuen Uribealdeak markagailua irekitzea. Entsegu bati esker bost puntu eskuratu zituzten bizkaitarrek. Talde irundarrak aurre egin zion egoerari eta gogor gainera, ez baitzion utzi Uribealdeari puntu bakar bat gehiago egiten.
Hala, 11. minutuan Poncini eta Oskozen arteko jokaldi bati esker, entsegu bat eraldatu eta irundarren aldeko 7 puntu lortu zituzten. Hortik aurrera partida menderatzea lortu zuen Irun RTk, eta 24. minutuan Genua eta Manterolaren arteko antzeko jokaldi bat medio, markagailua 14-5era igotzea lortzen zuten beltzek.
33. minutuan eraldatutako hirugarren entsegua egiten zuten Solisek eta Manterolak, irundarren aldeko zazpi puntu gehiago eskuratuz. Atsedena iritsi zenerako, 21-5 irabazten zuen Irun RTk.
Partidaren bigarren erdian gogor aritu ziren defentsan bizkaitarrak, eta irundarren erasoen gehiengoa gelditu zituzten arren, beste bi entsegu eta bonus puntua lortu zituen bertako taldeak.
Datorren larunbatean Getxo taldearen aurka lehiatuko da Irun RT, etxetik kanpo jokatu duten partidan.
