Bidasoarren arteko derbia irabazita, jaitsieratik atera da Hondarribia

Txuribeltzak indartsu zelairatu ziren baina berdeak finago aritu ziren azken metroetan. 12. postutik hiru puntura jarri dira eta hurrengo asteburuan goranzko bideari eutsi nahi diote.

Asier Perez-Karkamo

Hondarribia

2015/02/09

Hondarribia, erasoan [kiroletik.eus]

Real Union Bren kontra 2-0 irabazi zuen Hondarribiak larunbatean Hondartza futbol zelaian. Ohorezko Mailako derbia irabazteaz gain, jaitsierako postuetatik irten dira berdeak, eta 12. postutik partida bakarrera jarri dira. Sailkapeneko behealdea erabat estutu da asteburuan. Antzuola azkena da nabarmen —12 puntu ditu, hurrengo taldeak baino 8 gutxiago—, baina ondoren sei talde daude hiru punturen barruan. 20 punturekin Usurbil, Hondarribia eta Bergara daude, 21 ditu Aloña Mendik, 22 Zarautzek eta 23 Ostadarrek. Hori bai, Aloñak eta Usurbilek partida bat gutxiago jokatu dute. Kiroletik.eus webguneko kronikan azaltzen denez, irundarrak gogotsu zelairatu ziren, baina Hondarribiak 20. minutuan lehen gola sartu zuen, eta hortik aurrera markagailuari eutsi zion, “lehiari eta borrokarako gaitasunari esker”. Bigarren gola, 83. minutuan sartu zuen Hondarribiak, txuribeltzen ahaleginak ezerezean utziz. Goranzko joera Sailkapenari kasu eginez, Real Union zen faborito, baina Hondarribia dagoen lekuan dago liga hasiera kaxkarra burutu zuelako, eta oraindik hori ordaintzen ari delako. Nolanahi ere, jokoa hobetzen joan dira berdeak, eta emaitzak ere iristen hasi zaizkie. Ligako lehen zazpi partidetan puntu bakarra lortu bazuten, azken zazpietan hamabi puntu pilatu dituzte, sekulako aldea. Datorren asteburuan Ordizian jokatuko du Hondarribiko lehen taldeak. 31 punturekin, zortzigarren tokian daude ordiziarrak, baina denboraldi irregularra daramate. Etxean sei partida galdu dituzte orain arte eta zazpigarrena hurrengo asteburuan izatea nahi du Hondarribiak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.