Hondarribia Eskubaloiak ezin izan du Tolosaren defentsa gainditu

Javi de la Hazaren mutilek min hartutako jokalarien hutsunean nabaritu dute eta 22-31 galdu dute etxean. Hogei minuturen faltan gol batera jarri dira etxekoak baina azken minutuetan hustu egin dira.

Asier Perez-Karkamo

Hondarribia

2015/02/02

Tolosaren defentsa gainditu ezinean ibili zen Hondarribia

Hondarribia Eskubaloiak 22-31 galdu zuen atzo Tolosaren kontra Hondartza kiroldegian, Lehen Mailako bigarren itzuliko hirugarren partidan. Lehen zatian etxekoek hala nola eutsi zioten aurkariari, baina bigarrenean bi taldeen artean alde handia dagoela argi geratu zen. Berdeek laupabost jokalari dituzte min hartuta eta minutuak aurrera joan ahala gabezia hori asko nabaritzen ari dira. Aurreko asteburuan azken minutuetan galdu zuten Zumaian, eta atzo, bigarren zatiaren hamargarren minutu aldera gol bakarrera jarri ziren arren, indarrik gabe geratu ziren eta Tolosak aprobetxatu zuen markagailuan tartea irekitzeko. Hondarribiarren artean, Iñigo Gomez bikain aritu zen zazpi metroetatik eta etxekoen golegile nagusia izan zen, 7 golekin. Sei jokalarik baino ez zuten tolosarren atea zulatu, eta horrek argi uzten du hondarribiarrek zailtasun handiak izan zituztela urdinen defentsa gainditzeko. Apenas hegaleko jokorik gabe, porteria parean harresia ezarri zuen Tolosak, piboteen jokoa eragotziz eta etxekoen jaurtiketak zailduz. Jaitsieraren mamua Liga amaitzeko asko falta bada ere, Hondarribiaren egoera larria da. Bi taldek galduko dute maila eta azkenbigarren dira Javi de la Hazaren mutilak, eta aurreko taldea bi puntura dute. Usurbil da talde hori eta otsailaren 22an Hondarribian jokatuko du. Hondarribiak nahitaez irabazi beharko du usurbildarren kontra, ahal badute 6 goleko averagea gainditu, eta horrez gain beste partidetan puntuak pilatu behar dituzte, Usurbilek seguruenik hori ere egingo duelako. Dena ondo, hiru asteburu barru min hartutako jokalari batzuk jokatzeko moduan izango dira, eta ohiko jokoa egiteko aukera handiagoak izango dituzte berdeek. Horren aurretik, datorren asteburuan Santoñara bidaiatuko du Hondarribiak. Multzoko talde indartsuenetakoa da Kantabriakoa, sailkapeneko hirugarrena.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.