Peña: "Bilduko gobernuak ez du ez anbizio ez proiekturik Errenteriarako"
Peñaren esanetan, "urte honetarako aurrekontu proiekturik ez aurkeztea erabaki du. Ondorioz, automatikoki joan den urtean onartutako aurrekontuak mantenduko dira"
EAJren udal taldeko bozeramaile eta alkategaiak esan du EH Bilduk “ez duela errenteriarren egoera hobetzeko anbiziorik, ezta Errenteriarako proiekturik ere”. Bere esanetan, “urte honetarako aurrekontu proiekturik ez aurkeztea erabaki du. Ondorioz, automatikoki joan den urtean onartutako aurrekontuak mantenduko dira”. Peñaren ustez, horrek “bistan uzten du” Errenteria-Oreretaren alde lan egiteko eta egoera hobetzeko “konpromiso eta anbiziorik ez” dutela.
EH Bilduk udal hauteskundeak prestatzeko lehentasuna duela iritzi du jeltzaleak. “Badirudi gobernuarentzat ez dela lehentasunezkoa proiektu berriak sustatuz ekonomiari bultzada ematea, behartsuenei laguntzeko partidak bideratzea, ezta herritarren egunerokotasuna hobetuko duten proposamenak egitea ere”, esan du. Bere esanetan, aurrekontuen bitartez ekonomia “egonkortuko” litzateke. Azkenik, nabarmendu du udalerriak “proiektu berriak garatzeko anbizioa” duen udal gobernu taldea behar duela.
