Aho batez onartu dute EH Bilduko eta H1-eko zinegotziek asteleheneko atxiloketen kontrako mozioa.
EH Bilduko eta H1-eko zinegotziak izan ziren plenoan
Onintza Ostolaza aske gelditu eta gutxira, ezohiko udalbatzarra egin zuten atzo Oiartzungo udaletxean asteleheneko polizia operazioa gaitzesteko mozioa oinarri zuela. Lau puntuko mozioa aho batez onartu zuten plenora agertu ziren zinegotziek (EH Bildukoak eta H1-ekoa), eta bertan izan ez zirenei (EAJkoak) “horrelako gai baten aurrean posizionatu daitezela” eskatu zieten. “Gure asmoa alderdi guztiek bat egitea bazen ere, ez da horrela izango”, esan zuen Aiora Perez de San Roman alkateak. Herritar asko izan ziren udaletxeko areto nagusian.
Mozioaren testuan asteleheneko polizia operazioa eta atxiloketak salatzen ziren, eta aldi berean, presoen defentsa eramaten duten abokatuen lanaren “balioa” aitortzen zen, tartean, Onintza Ostolazaren lanarena; abokatuari eta haren senide eta lagunei elkartasuna adierazi zieten. Operazioagatik Espainiako Estatuak “izaera ez demokratikoa” duela, eta “antzinako agertokietara” joateko bidea hartua duela deitoratzen zen mozioan “oinarrizko eskubideen urraketa honekin”. Bakearen bidean urratsak egiten ari direla esan zuen alkateak “bakea nahi dugu”, baina horren kontrako “oztopoak” daudela zehaztu zuen. Eta polizia operazioa ez zela ausazkoa izan esan zuen alkateak, “Bilboko manifestazioari Espainiak eman dion erantzuna izan da”.
Bukatzeko, datozen egunetan antolatuko diren mobilizazioetan parte hartzera deitu zituen herritarrak.