Trapagaranek bi puntuak eraman ditu Hondartza kiroldegitik
Hondarribia Eskubaloiak ezin izan du punturik lortu lehen itzuliko azken partidan eta Espainiako Lehen Mailako 3. multzoko azkenaurreko postura jaitsi da. Bigarren itzulia liderrarekin hasiko dute berdeek, etxean.
Ereintzak azkenaren kontra lortutako garaipena eta gero, sailkapeneko azkenaurreko postura jaitsi da Hondarribia Eskubaloia. Lehen itzuliko azken partida jokatu dute asteburuan eta hondarribiarrek galdu egin zuten Trapagaranen kontra (21-25), atzo eguerdian Hondartza kiroldegian jokatutako partidan.
Hondarribia gogotsu kantxaratu zen, eta 19. minutura arte aurretik izan zen markagailuan. Baina 9nako berdinketaren ostean bizkaitarrak gehiago izan ziren, eta atsedenaldira hiru goleko errentarekin joan ziren (12-15).
Bigarren zatiaren hasieran defentsa sendotu zuten bi taldeek; lehen bost minutuetan bi gol baino ez zituzten sartu, talde bakoitzak bat. Hortik aurrera, Trapagaranek lau goleko tartea irekitzea lortu zuen eta partidaren amaierara arte ondo kudeatu zuen abantaila hori.
Hondarribiarren artean, sei jokalarik baino ez zuten aurkariaren atea zulatu. Gorka Wanba eta Iker Mateos izan ziren golegile nagusiak, bosna golekin. Bizkaitarren artean Jon Bosco izan zen golegile nagusia, 8 golekin.
Bigarren itzulia etxean hasiko du Hondarribiko taldeak, liderraren bisitarekin. Eibarrek, orain arteko partida guztiak irabazi ditu. Ligako lehen partidan zazpi golez nagusitu ziren eibartarrak (24-17).
