Preferenteko Hondarribiak 12.a harrapatu du, Muniberi irabazita
Bigarren taldeak 1-2 irabazi du Berion eta 14 punturekin amaitu du lehen itzulia. Azken sei partidetatik lau irabazi ditu eta azkenarekiko bederatzi puntuko tartea ireki du.
Liga hasi zenetik egoera onenean dago Hondarribiko bigarren taldea, 13. tokian, hamabigarrenarekin berdinduta. Larunbatean garaipen garrantzitsua lortu zuen Donostiako Berio futbol zelaian, Muniberen kontra (1-2) eta atzekoekiko tartea handitu du. Denboraldi hasiera kaxkarra eta gero, suspertu egin da taldea, eta Preferente Mailari eusteko borrokan indarberrituta bukatu du lehen itzulia.
Ligako lehen zortzi partidetan puntu bakarra lortu zuen, eta etorkizuna ilundu egin zitzaien. Baina hurrengo zazpietan hamahiru puntu pilatu du Hondarribia Bk, eta jaitsierako postuetatik irteteko eta arnasa hartzeko ere balio izan dio horrek. Une honetan hiru talde ditu azpitik; gertuena Pasaia da, lau puntura. Hain zuzen ere, Pasaian berdinduz abiatu zuten berdeek bolada ona.
Muniberen kontrako garaipena eta gero Hernanirekin berdindu du Hondarribiak eta Deusto Donostia bi puntura du. Hurrengo asteburuan Donostian jokatuko dute berriro, Puioko belargunean, Vasconiaren kontra. Ligako hirugarren postuan daude donostiarrak, eta hortaz, zaila izango dute berdeek punturen bat eskuratzea bertan. Nolanahi ere, ligako lehen itzulian bi taldeek berdindu egin zuten Hondartzan.
