Lau tailer antolatu ditu Bidasoa Bizirik-en autoenplegu arloak
Urtarrilean zehar garatuko dira tailerrak eta lau egunetan banatutako bi ikastaro izango dira denera; lehena, enpresa txiki bat sortzeko asmoa dutenei zuzenduta dago eta bigarrena, negozio ideia bat dutenei.
Bidasoa Bizirik erakundearen Autoenplegu departamentuak bi tailer antolatu ditu hil honetan zehar. Lau egunetan zehar garatuko dira tailerrak.
Hala, lehena, enpresa txiki bat eratzeko interesa duten lagunei zuzenduta dago eta “gai fiskalei buruzko oinarrizko informazioa emango du. Halaber, erantzun beharreko betebehar fiskalen berri ere emango du tailerrak”, azaldu dute Bidasoa Bizirik-eko teknikariek. Gaur eta hilaren 22an garatuko dira eskolak, 14:00etatik 16:00etara.
Bigarrenari dagokionez, negozio ideia bat hausnartzen lagunduko du Canvas ereduaren bitartez. Tailerra hilaren 26an eta 29an garatuko da, 09:00etatik 13:15era. Antolatzaileen arabera, “tailerra praktikoa izango da eta taldeko ikasketa prozesua izango du oinarri. Esperientzien eta ikuspuntuen elkartrukea bilatuko du, proiektu bakoitza aberasteko asmoz”.
Irene Martinezek gidatuko ditu ikastaroak. Izena emateko interesa duten lagunak 943 633 937 telefono zenbakira dei dezakete.
