Goizez eta arratsaldez izango dira borrokak. Kadeteen Espainiako Super Kopako proba izango da. 371 judoka lehiatuko dira, tartean pisu bakoitzean Espainiako sailkapeneko lehen postuetan daudenak eta Portugal, Andorra eta Frantziako federazioetakoak. Ama Guadalupekoak bederatzi ordezkari izango ditu tatamian.
Federazioak oroigarri bat eman zion udalari, txapelketa babesteagatik
Ia 400 kirolari, Iberiar penintsulan lehiatzen diren kadete mailako judoka onenak, kimonoa jantzita agertuko dira larunbatean Hondarribiko Jostaldi pilotalekuan, Ama Guadalupekoa XXIII. Nazioarteko Judo Txapelketan. Kadeteen Espainiako Super Kopako proba izango da, 2015eko denboraldiko lehena, eta kadeteetan izen handiena duena.
Atzo egin zuten aurkezpena, udaletxean, eta bertan izan ziren Ama Guadalupeko Judo Taldeko ordezkari Ander Goikoetxea, Txomin Sagarzazu Kirol zinegotzia, Sergio Bello Euskadiko Federazioko presidentea eta Manuel Agirre eibartarra, bigarren aldiz txapelketako zuzendari tekniko lanak egingo dituena.
Amako ordezkari Ander Goikoetxeak azaldu zuenez, bederatzi izango dira larunbateko txapelketan ariko diren herriko kirolariak, “hamar izan behar ziren baina Maialenek [Ramos, Espainiako rankinean lehena bere pisuan] udan belauneko lotailu gurutzatuak puskatu zituen”. Goikoetxeak ondo ikusten ditu Amako judokak baina podioren bat lortzea egunaren araberakoa izango dela deritzo, “oso zaila da, maila oso handia dagoelako”. Bederatzietan hasiko dira borrokak eta azken finalak arratsaldeko seiretarako daude programatuta.
Orotara, 370etik gora kirolari lehiatuko dira larunbatean Jostaldi pilotalekuan jarriko diren tatamietan. Euskal Federazioko presidente Sergio Bellok azaldu zuen Ceuta eta Melilla ezik, Espainiako Estatuko erkidego guztietako judokak izango direla: “Rankineko onenak daude, eta Portugal eta Andorrako selekzioak”. Ipar Euskal Herriko ordezkariak ere etorriko dira Hondarribira, Frantziako federazioa ordezkatuz. Txapelketaren goi maila nabarmentzeaz gain, Ama Guadalupekoa judo taldeari buruz hitz politak izan zituen Euskadiko Federazioko presidenteak: “Txapeldunen eskola da, esfortzuarekin uzta ematen ari dena”.
Helburua, kirola egitea
Larunbatean izango da lehiaketa, goiz eta arratsaldez, baina aurretik eta ondoren ere izango da judoaz gozatzeko aukera Jostaldin. Ostiral arratsaldean Gipuzkoako judoka kimuak eta benjaminak elkartuko dira Hondarribiko frontoian. Eta igandean, goizez, teknifikazio jardunaldia egingo dute txapelketan parte hartuko duten taldeek. Elkarrekin entrenatuko dute eta teknikak partekatzeko aukera izango dute horrela.
Izan ere, larunbatekoa maila handiko txapelketa izango bada ere, Ama Guadalupekoa klubaren azken helburua kirola egitea da, Goikoetxeak nabarmendu duenez: “Txapelketa ez da helburua, lehiatzea ez da helburua, ahalik eta herriko neska eta mutil gehien egotea judo egiten, hori da klubaren helburua, haurrek kirola egitea”.
Haurren mailatik aurrera nazioarteko lehiaketetan parte hartzen dute Amako judokek, nahi dutenek, lehiatzea ez delako derrigorrezkoa: “Denboraldi bakoitzaren hasieran galdera egiten da, zeinek nahi du lehiatu eta zeinek nahi du lehiatu gabe aritu”. Hala, nahi duenak lehiatzeko aukera du eta gurasoen laguntza izaten du klubak zeregin horretan. “Gurasoen inplikaziorik gabe ezinezkoa litzateke, beraiek ordaintzen dituztelako bidaiak. Esfortzua da bai, nekatzen du, baina gustura egindako esfortzua da, hemen inor ez da behartzen”, argitu du Goikoetxeak.
Larunbatean lehiatuko diren kadete hondarribiarrak
- Aitor Goikoetxea. -50 kilo.
- Joaquin Lopez- -55 kilo.
- Eneko Aragon. -60 kilo.
- Antxon Lekaroz. -60 kilo.
- Iñigo Gonzalez. -66 kilo.
- David Martiarena. -66 kilo.
- Antxon Mitxelena. -66 kilo.
- Aritz Garcia. -73 kilo.
- Joel Herrador. -73 kilo.
