Kolonbiako eta Euskal Herriko gatazkak hizpide gaur Kabigorrin
Mundu Bat GKEk, Antxeta Irratiak eta Pausumedia elkarteak antolatutako Kolonbiako jardunaldien barruan, Jimmy Ortiz Asturiasen errefuxiatutako kolonbiarrak eta Lokarriko Aitziber Blancok hitzaldia emango dute gaur arratsaldean.
Kabigorri Bidasoaldeko Ateneoan finkatu dute hitzaldirako hitzordua Antxeta Irratiak, Pausumediak eta Mundu Bat gobernuz kanpoko erakundeak (GKE). Kolonbiako jardunaldien barruan Lokarriko Aitziber Blancok eta Asturiasen errefuxiatutako Jimmy Ortiz kolonbiarrak solasaldia eskainiko dute bertan, gaur, 19:00etan abiatuta. Euskal Herriko eta Kolonbiako gatazken gakoak mahaigaineratu eta horiek aztertzen saiatuko dira bi hizlariak.
Kolonbiako gatazkaren gaineko argazki erakusketa ere abiatu zuten antolatzaileek jardunaldien barruan. Urriaren 27an inauguratu eta hilaren 7ra arte ostiralarekin ikusteko aukera izango dute interesatuek, Kabigorrin.
Era berean, Unai Aranzadik ekoiztutako Colombia Invisible –ikus-entzunezkoa gazteleraz– dokumentala eman zuten iragan astean Lakaxita gaztetxean. Fernando Vaquerizo Mundu Bateko kidea kontent agertu zen ikus-entzunezkoak izandako harrerarekin eta batez ere, horren ondotik sortutako solasaldi eta eztabaidarekin.
