Ala itsasontzi bat eraikiko dute asteburuan Albaolako arotzek
XX. mendera arte sagardoa zein bestelako zamak garraiatzeko ala itsasontziak erabiltzen zituzten Urumea ibaian, eta usadio hori ahaztu ez dadin, asteburuan, Albaola elkarteko arotzek horietako itsasontzi baten erreplika eraikiko dute Donostiako kaian. Proiektuak Urumearen dinamizazio turistikoa du helburu eta Lizeaga eta Petritegi sagardotegien laguntzaz gauzatu da. Donostia/San Sebastian 2016 Europako Kultur Hiriburutzak antolatutako Olatu Talka kultur jaialdiaren barruan kokatu behar da iniziatiba. Behin ala itsasontzia eraikita, Urumea inguruan gastronomia, turismoa eta ondarea batzeko baliabide turistiko gisa erabiliko dute. Horrez gain, igandean, 13:30ean, idiek tiratutako gurdi kupela izango da kaian.
