![Gotzon Sanchez](http://bidasoa.hitza.eus/site/files/2014/05/Captura-de-pantalla-2014-05-21-a-las-16.10.53-300x116.jpg)
Gotzon Sanchez
Gotzon Sanchez aktorea (Errenteria-Oreretakoa da) “gaindituta” dago bera protagonista den iragarkiko markak spot hori kendu ostean sortu den ika-mikarekin. Dignidad y Justiciak eskatu dio marka horri iragarkia kentzeko presoei elkartasuna adierazi diela argudiatuz. “Orain arazo bat dago: Coca-Colak kendu egin du emisiotik iragarkia, kasu eginez Dignidad y Justiciari. Hor badago arazo bat. Horrek markatzen du aurrekari bat. Hemendik aurrera zer gertatuko da gure profesioan? Gure historiala, gure curriculuma begiratuko dute?”. Zehazki, bere irudia desprestigiatzeko saio bat egon dela iritzi dio Sanchezek.
“Nik modu irekian lanean jarraituko dut herri honetan behin betiko bakea lortu arte, biktima guztiak inolako ezberdintasun gabe gerturatu daitezen, bakoitzak bere egonezin hori aska dezan, duela hilabete Madrilen egin genuen bezala, eta hori ez zen berria izan”.
Ez du neurririk hartu, baina maila legalean informatzen ari dela gaineratu du.
Era berean, elkartasun mezu pila bat jasotzen ari dela jakinarazi du aktoreak.