Dorronsoro, Gonzalez eta Agirre, atzo
Mende erdia ari da ospatzen aurten Oiartzungo Lartaun Abesbatza. Horri lotuta hainbat ekitaldi egin dituzte urtearen lehen erdian. Baina aurrerantzean ere ez dira geldirik egongo, kultur eragile batek 50 urte betetzea ez delako nolanahikoa. Hortaz, atzo aurkeztu zituzten irailera bitarteko jarduerak. Mamitsuak dira, eta herrian nahiz herritik kanpoko hainbat agertoki esanguratsutan egongo dira. Aurkezpenean Lartaungo lehendakari Moises Gonzalez, Maddalen Dorronsoro zuzendaria eta Esteban J. Agirre idazkaria izan ziren.
Lehen hitzordu garrantzitsua ostiralean bertan izango dute. Errenteria-Oreretako 42. Musikasteren barruan kontzertua emango du Lartaunek Fatimako Andre Mariaren parrokian. 20:30ean hasiko dute saioa, eta lau piezako egitaraua prestatu dute oiartzuarrek,
Blonda xarmanta,
Xarmangarria Zera,
San Juan de la Portalateña eta
Gurea da kantekin. Lau kanta izango dira, izan ere, Musikasteren barruko abesbatzen eguna da ostirala.
Hainbat gauza daude nabarmentzeko kontzertu horretan. Batetik,
Blonda xarmanta pieza Xabier Sarasolak abesbatzaren 50. urteurrenerako espresuki idatzitako obra da, eta Musikasten estreinatuko dute.
Xarmengarria zera eta
San Juan Portalateña lanak, ordea, Alberto Mitxelena konpositore irundarrarenak dira; aurten 110 urte bete dira Mitxelena jaio zela. Azken obra,
Gurea da, Sabin Salaberria konpositore garaikidearena da, eta Lartaun Txistulari Taldeko kideek ere parte hartuko dute horretan.
Eta bukatzeko, “esklusiba bat” iragarri dute oiartzuarrek. Emanaldia bukatzeko sorpresa bat prestatu dute.
Aurrekoak ostiraleko emanaldiko xehetasunak dira. Alta, honakoak dira iraila bitartean prestatu dituzten bestelako jarduerak:
- Ekainaren 17an, Aita Donostia Aste Musikalaren barruan kontzertua emango dute Donostiako Kaputxinoen elizan.
- Uztailaren 31n, Harri Beltzak urtero antolatzen duen kontzertuaren protagonista izango dira, Oiartzungo Done Eztebe parrokian.
- Irailaren 19an, 50 urteen errepasoa egiteko erakusketa zabalduko dute udaletxeko areto nagusian.
- Irailaren 20an, Euskal Sena ikuskizuna emango dute Elorsoro kiroldegian.
- Irailaren 21ean, kontzertua emango dute Done Eztebe parrokian.
