Velaskoko etxe eta pabilioi zaharrak eraisteko izapideak martxan dira
San Pedroko Velascoko etxe zaharrak eta pabilioiak eraisteko prozedura martxan jarri du udalak. Bertako iturriek jakinarazi dutenez, Salinas Berri eraikuntza-enpresaren porrotak “oso egoera txarrean utzi ditu Velascoko etxeak eta azpiko pabilioiak”. Arriskuak ekiditeko, Udalak pabilioiak eraisteko lanak bere gain hartzea erabaki duela iragarri du eta eraisketa-lan horiek ordaintzeko, enpresa eraikitzaileak obra egiteko jarri zuen bermea erabiliko dutela jakinarazi du. Zehaztu dutenez, enpresa eraikitzaileak jarritako abala exekutatu berri du udalak eta, ondorioz, dirua udalaren eskuetan dago jada. Esnabide kalean eraiki gabe geratu den ingurua txukuntzeko erabiliko dute abalaren dirua.
Eraisketa-lanak kontratatzeko prozedura martxan jarri eta horretarako, hiru enpresei aurrekontua aurkezteko gonbita egin diela jakinarazi dute udaleko iturriek, ondoren, proposamenik egokienari lanak esleitzeko. Udalak “lehenbailehen” ekin nahi die eraiste lanei, “gune arriskutsu hori desagertu dadin”.
