Emakume migratzaileen taldea sortuko dute Pasaian
Migrazio prozesua bizi izan duten emakumeen egoera hobetu nahian, emakume migratzaileentzako taldea sortzeko asmoa dute Pasaian. Udaleko Migrazio eta Aniztasunaren eta Berdintasunaren arloek emakumeen jabekuntza eta parte hartze sozio politikoa sustatzeko lanean ari dira Pasaiako Berdintasunaren Mahaian, eta emakume migratzaileentzako taldea sortzeko asmoa, lan ildo horren barruan kokatu beharra dago. Taldea eratuta, migratutako emakume bakoitzaren eskarmentua eta jakinduria baliatu nahi dute, eta halaber, harreman sareak sortu, egungo baliabideen berri izanda, dauden beharrei erantzuna emateko.
Iniziatiba honen berri emateko informazio saioak egingo dituzte Antxon eta Trintxerpen. Saio hauetan taldearen helburuak eta taldearen antolamendua nolakoa izango den azalduko dute. Informazio saioak iraun bitartean haurtzaindegi zerbitzua izango da, baina haren beharra dutenek hiru egun lehenago jakinarazi behar dute 943 004 320 telefono zenbakira deituta.
Antxoko informazio saioa astelehenean izango da, 18:00etan, kultur etxean; Trintxerpekoa, asteartean, 18:00etan, Trintxerpeko alkateordetzan.
