Artista liburu eta arte koadernaketak badute beren tokia
Bi astez, artista liburu eta arte koadernaketari tokia egingo diote Merkatuzarren, eta atzo topaketa horiek inauguratu zituzten. Horrenbestez, apirilaren 6ra bitartean, bi diziplina horiek ezagutu ahal izango da erakusketa nahiz tailerren bitartez.
Bertan izan ziren Arteliburu 21 topaketak antolatu dituzten taldeko kideak: Luis Barrios, Eva Rodriguez eta Eluska Kortajarena.
Artista liburua eta arte koadernaketa zer ziren azaldu zuten, lehenik. “Artista liburua XX. mendeko arte garaikidearen barruko diziplina” dela jakinarazi zuen Kortajarenak, eta forma eta eduki ugari garatzeko gai dela, egungo liburuaren forma eta itxuratik kanpo. Arte koadernaketa, berriz, liburuaren edukiari lotzen zaion arte lana dela zehaztu zuen Rodriguezek, “liburua babestu eta artikulatu” egiten duena.
Egun hauetan egingo dituzten tailerrak herritar guztiei irekiak dira, eta ez dute zertan aurretik bi diziplina horiek kontrolatu behar. Horrez gain, haurrentzako tailerrak ere egingo dituzte. Esaterako, aste honetan Errenteria-Oreretako Langaitz ikastetxeko haurrak pasatu dira tailerretatik, eta datorren astean Donostiako Lau Haizeta eta Arteko Tailerreko haurrak pasatzea espero dute.
Erakusketa zenbait gunetan banatu dute. Sartu bezain laster, artista liburuen erakusketa ikus daiteke, eta segidan, arte koadernaketako lanak. Ondore, Arteliburu 21ekoek egindako lanak daude, eta atzean, artista liburu erraldoi bat, Olatu Talkan egindakoa, eta Krisiaren liburua deitutakoa. Alboan, tamaina txikiagoko liburu bat dago, eta hori betetzea espero dute antolatzaileek. Tailerrak egiteko guneak albo batean daude.
Egitaraua hemen: http://oarsobidasoa.hitza.info/2014/03/19/arte-liburu-eta-koadernaketa-topaketak-egingo-dituzte/
