La Bacaladerak bigarren postua berreskuratu du
Igoera fasea jokatzeko aukera ematen duten lehen bi postuetako bat lortze aldera lehen finala zuen La Bacaladera Hondarribia eskubaloi taldeak asteburuan. Azken jardunaldian bigarren postua galduta zuen, Zarauzko Amenabarren alde, eta sei partida geratzen ziren berreskuratzeko. Bada lehenengoan lortu dute eta orain eutsi beharko diote hurrengo bost partidetan.
Ez zuen partida erraza La Bacaladerak, lehen itzulian irabazi zion Erandioren kontrakoa. Hondarribiarrek baino bost puntu gutxiago zuten bizkaitarrek, bosgarren tokian, baina partida bat gutxiago jokatuta eta bigarren posturako hautagaietako bat zen oraindik. Baina ja ez da igotzeko hautagai, atzo Hondartza kiroldegian 23-17 galdu zutelako eta berdeekiko tartea dagoeneko zazpi puntukoa delako —falta zaien partida irabaziz gero, bostekoa—.
Lehen baldintza beteta, Amenabarrek huts egitea falta zen, eta huts egin zuten zarauztarrek, etxean Urdulizekin 24-26 galdu baitzuten. Urduliz laugarrena da eta Amenabarrek baino puntu bat gutxiago du eta La Bacaladera bi puntura du. Gainera, liderrarekin ez beste guztiekin alde du average-a La Bacaladerak, Amenabarrekin, Urdulizekin nahiz Erandiorekin. Hortaz, eta kontuan izanik aurkariek baino egutegi erosoagoa duela, Javi de la Hazak entrenatzen duen taldeak aukera asko ditu liga bigarren postuan bukatu eta denboraldia luzatzeko.
Ezer gutxi axola duen arren, Usurbil liderrak puntu bat galdu du asteburuan, 26na egin zuelako Soraluzen. Lortutako berdinketarekin, bost partidaren faltan, matematikoki ziurtatu du igoera fasea jokatzea; lehen postuan ez bukatzeko dena galdu eta Hondarribiak dena irabazi beharko luke. Ziurrenik, heldu den asteburuan ospatuko dute liga txapelketa usurbildarrek.
