Irungo Sius eremuan 427 zuhaitz landatuko dituzte larunbatean
2013an Irunen jaio diren haurrei aitortza egiteko, larunbatean 427 zuhaitz landatuko dituzte Sius aldean (Ibarlan dago). Zuhaitz Bat, Haur Bat egitasmoaren barruko ekitaldia da; 2004an hasi ziren hori egiten hirian, hau da, aurreko urtean jaiotako haur bakoitzeko (hala eskatzen dutenek) zuhaitz bat landatzen. Ordutik, 3.693 zuhaitz gehiago daude Irunen.
Gaur egin dute jardueraren aurkezpena. Miguel Angel Paez Ingurumen zinegotziak esan duenez, Irungo familiek irrikitan itxaroten duten ekitaldia da larunbatekoa, eta haurren aitortza egiteaz gain, ingurumenaz eta naturaz gozatzeko aukera ere bada.
Zuhaitza landatu behar duten familiek badakite jada zein ordutan egin behar dute. Horrela, udalak jakinarazi duenez, sei txanda egingo dituzte larunbatean. Horrela, txanda bakoitzerako autobus zerbitzua prest dutela esan du Paezek, Bixera zaharretik abiatuta.
Landaketagatik, 09:00etatik 13:30era moztuta egongo da Toki Alai ikastetxera joateko errepidea.
