Irungo Bilgune Feminista: "Kaleen gaian guk egindako proposamena babestea eskertzen dugu"
Asteazkeneko udalbatzarrean, Irungo lau kaleri izen frankistak kendu eta beste lau izen jartzea deliberatu zuten zinegotziek, horietatik hiru emakumeen borrokekin nahiz lorpenekin lotutakoak (Martxoak 8 kalea, Poxpologileen kalea, eta Maritxu Anatol kalea). Irungo Bilgune Feministak 2010en proposatu zituen izen horiek kale izendegirako, eta pozik agertu dira aldaketarekin: “Guk egindako proposamena babestea eskertzen dugu”. Horrela, bide horretan proposamenak egiten jarraituko dutela esan dute Bilgune Feministako kideek, eta jendartea zein talde politikoak ildo horretan ikertzen zein babesten jarrai dezaten eskatu dute,
Baina gogoeta ere egin dute. Irungo biztanleen %51,1 emakumea izanda, orain 3 urtera arte emakumeen izenarekin soilik hirian 3 kale zeudela adierazi dute, eta historia emakumeen zein gizonen jardunean oinarritzen denez, “biziki garrantzitsua da emakumeen lana ere jendartearen imajinario kolektiboan horrela azaltzea, baita errekonozitzea ere”. Bilgune Feministako kideen ustez ezinezkoa da Irun emakumeen aportaziorik gabe imajinatu, zientzian, artean, kulturan, hezkuntzan zein lan munduan eta baserrietan.
