PSE: "Hondakinen gaineko prozesuan egongo gara, baina presio eta inposiziorik gabe"
Errenteria-Oreretan hondakin bilketa sistema bat ezartze aldera, metodologia bat adostu du talde politikoen artean. PSE-EEk bertan izango dela adierazi du. Haatik, “alde bateko edo besteko presio edo inposiziorik” ez dutela onartuko gaineratu du. Era berean, erabakiak Bozeramaileen Batzordera eta Ingurumeneko komisio informatiboan hartuko beharko direla esan du.
Hala eta guztiz ere, hondakinen bilketa sistemari dagokionez, Errenteriak hartu behar duen bidea bosgarren edukiontziari lotuta joan behar duela argi du PSE-EEk: “Errenteriako biztanleek ardura erakutsi dute, birziklatzean aitzindariak izanez, eta inposizioen beharrik gabe”.
Era berean, behar diren azpiegiturak lehenbailehen jartzeko udalak diputazioari eskaera egin behar diola adierazi du PSE-EEk.
