Ekitaldien batzordea gaur bilduko da bigarrenez Trintxerpen
18:30ean, alkateordetzan. Hortxe zita Trintxerpeko sutean kaltetutakoei laguntzeko ekitaldien batzordeak deitutako bilerara joan nahi dutenentzat. Bigarrenez bilduko da gaur ekitaldien batzordea, eta bilera horretan jarraituko dute elkartasun ekimenak antolatzen eta koordinatzen. Ideia eta asmo asko plazaratu dira aipatu batzordean eta horiei bide eman eta koordinatzeko deitu dute bilera.
Hurrengo ekimena rock kontzertua izango da. Hogei taldek joko dute, otsailaren 21ean eta 22an, 16:00etatik 04:00etara. Txartelak eta sarrerak babesle batek egingo ditu, doan. Antxoko Jai Batzordeak argiteria eta soinu ekipoak utziko ditu. Horrez gain, 2012an tatuajeetan munduko txapelduna izandakoak, kontzertuaren egunean egingo duten zozketa baten irabazleari tatuajea egiteko prestutasuna agertu du.
Festa, kirola, eta bigarren eskuko azokak
Antxoko hainbat elkartek festa bat antolatu nahi dute ekainaren hasierarako. Kirol topaketa bat ere bada proposatutakoen artean, eta baita tonbola egitea ere, Zirizan bildutako soberakinekin.
