Heldu den astean Sahararako janari bilketa egingo dute Hondarribiko ikastetxe eta supermerkatuetan
Urte berriarekin abian da Sahararen Aldeko IX. Euskal Karabana eta, ohi bezala, Bidasoan ere egingo da bilketa, Tadamum Elkarteari esker. Helburua, Tindoufeko (Algeria) errefuxiatu sahararren kanpamentuetan bizi direnen egoera arintzea da.
Hondarribian, ikastetxeetan eta supermerkatuetan egingo da kanpaina, ikastetxeetan 13tik 17ra eta supermerkatuetan hilaren 17an eta 18an. Honako supermerkatuetan egingo da bilketa: Eroski, Super BM, DYA eta Aliprox.
Tadamumeko Andoni Irastorzak azaldu duenez elikagaiak eta konpresak behar dituzte: “Hiritarrei eskatzen dieguna, azukrea, arroza, pasta, lekaleak, hegaluzea, sardinak oliotan eta emakumezkoentzat beharrezkoak diren konpresak ekartzea da”. Bilketa egiteko laguntza beharko dutela gehitu du Irastorazk. Lagundu nahi duenak 666 50 13 50 telefono zenbakira dei dezake.
