Errolda egingo dute pertsonak
Hilaren 16tik 22ra Hendaiako biztanleriaren errolda eguneratzeko prozesua aurrera eramango dute. Horretarako bost erroldatzaile kontratatu ditu Herriko Etxeak, eta horiek etxeetara doazenean Estatistika eta Ikerketa Ekonomikoen Frantziako Institutuaren txartela eramango dute; ausaz hautatuko dituzte etxe horiek. Herriko Etxetik esan dute “erroldan parte hartzea gizalegezkoa dela”, eta bost bat minutuko tartea besterik ez dela haren galderei erantzutea, “egiezu, otoi, abegi ona erroldatzaileei”.
Frantziako Estatuan gisa honetako errolda eguneratzeak legez daude araututa, eta udal bakoitzaren eginbeharra da urtero urtero hori egitea; Herriko Etxeak emandako datuen arabera, urtero biztanleen %8 erroldatzen da modu horretara. Hendaiarrek emango dituzten datuak babestuta daude, honako puntuekin:
- Erroldatzea Frantziako Estatuan bizi den orori dagokio.
- Galderak berdinak dira erroldaturiko ororentzat.
- Bilduriko norbanakoen informazioak estatistikak egiteko besterik ez dira erabiliko eta ezin dute Administrazioaren edota zerga zerbitzuen inolako kontrolik ekarri.
- Erantzunak baliatuz sorturiko estatistika oro izenik eman gabe dira egiten.
- Galdetegiak erabiltzen dituen pertsona orok, eta errolda egin dezaten udalak kontrataturiko galdetzaileek bereziki, sekretu profesionala gorde beharra dute.
