Oarsoaldeko lau alkateek larunbatean Bilbon euskal presoen eskubideen alde egingo den manifestazioan parte hartzeko deialdiarekin bat egin dute. 17:30ean aterako da.
Mendoza, Zabalo, Perez de San Roman eta Canok manifestaziorako deialdia egin dute.
“Bakea eta irtenbideari atea ireki beharrean, Espainiako Gobernuak kolpe batez itxi nahi izan du”. Oarsoaldeko lau alkateen hitzak dira, EPPK-ren zortzi bitartekarien atxiloketaren harira. “Bake prozesua arriskuan jartzen dituzten eraso horiek euskal gizarteak soilik” gelditu ahal dituela gaineratu dute.
Zentzu horretan, garrantzitsutzat jo dute etzi Bilboko manifestaziora joatea. 17:30ean abiatuko da,
Tantaz tanta euskal presoen eskubideen alde lelopean.
“Herriaren etorkizun baketsua oinarri sendoen gainean” eraikitzeko, “urratsak ematea denei” dagokiela adierazi du Julen Mendoza Errenteriako alkateak, denen izenean. Eragile politiko eta instituzio diren aldetik, konponbidearekiko euren ekarpena egin nahi izan dutela gaineratu du.
Iaz egin bezala, aurten ere Oarsoaldeko lau alkateek bat egin dute euskal presoen eskubideen aldeko manifestazio deialdiarekin. Gaur egindako agerraldian egin dute hara joateko deialdia. Errenteria-Oreretako, Lezo eta Oiartzungo alkatea (Mendoza, Ainhoa Zabalo eta Aiora Perez de San Roman, hurrenez hurren) izan dira bertan, eta Pasaiako ordezkari gisa Juanra Cano alkateordea joan da, Amaia Agirregabiria alkateak ez duelako joaterik izan, Trintxerpeko sutearen ondorioz.
23 preso, bakarra Euskal Herrian
Mendozak gogorarazi duenez, 23 dira espetxean diren Oarsoaldeko preso politikoak, eta bakarra dago Euskal Herrian: Aitzol Gogorza oreretarra. Bera da salbuespen egoeran dagoenetako bat, larri gaixo baitago, beste hamabi euskal presorekin batera.
Zigorraren hiru laurdenak, berriz, beteak dituzte dagoeneko Juan Karlos Estevez
Melli eta Marina Bernado oreretarrek eta Imanol Iparragirre, Gorka Zulaika eta Balbino Saez pasaitarrek.
Aurten zerrenda hori murriztu da, Europako Giza Eskubideen Auzitegiak Parot doktrina atzera bota zuelako. “Bake integralaren, elkarbizitza demokratikoaren eta giza eskubideen alde urratsak emateko aukera eta bultzada gisa ulertu beharreko erabakia” dela nabarmendu du Mendozak.