10ekin eta atezainik gabe berdinketa lortu du Hondarribiak
Hondarribiak berdinketa lortu zuen larunbatean Getariako Ketaren aurka Hondartza futbol zelaian jokatutako Ohorezko Mailako partidan (2-2). Etxekoak faboroitoak ziren, baina partidaren hasieratik gauzak okertu zitzaizkien.
Hirugarren minutuan Hondarribiko atezainak areatik kanpora eskuarekin baloia jo eta epaileak kanporatu zuen. Falta hori jaurti eta 0-1 aurreratu ziren getariarrak. Hori gutxi balitz, bost minutura, 8.ean, ordezko atezainak aurkari baten kolpea jaso zuen aurpegian eta ospitalera eraman behar izan zten, begi ondoan zauri haundia zuelarik. Mikel Muguruza aurrelariak jarri behar izan zituen atezainaren eskularruak eta hortik gutxira iritsi zen Ketaren bigarren gola.
Aurrelaria atezain bezala, eta jokalari bat gutxiagorekin, maldan gora jarri zitzaion partida Mikel Llorenteren taldeari. Baina berdeek ez zuten burua makurtu eta “sekulako esfortzua eginez” —Llorentek kontatzen duen bezala—, “partida berdintzea lortu zuten eta irabazteko aukeraren batekin gainera”. Atsedenaren aurretik lortu zituen Hondarribiak bi golak —Xabier Eizagirrek 0-1ekoa eta Xabier Oliverik bigarrena— eta bigarren zatian partida irabazteko aukerak izan zituen, baina markagailua ez zen gehiago mugitu.
Horrela, meritu handiko berdinketa lortu zuen taldeak eta puntu baliagarri bat beste astebetez sailkapenaren goiko postuetan jarraitzeko. Egoera normalean hiru puntuak lortzeko faborito zen Hondarribia, baina hamargarren minuturako partidak hartu zuen norabidea ikusita, batek baino gehiagok pentsatu zuen sekulako gol sorta jasoko zuela etxeko taldeak. Entrenatzaileak jokalarien lana txalotu zuen epaileak partidaren amaiera adierazi zuenean: “Argi gelditzen da taldeak lorturikoa, Nire partetik, jokalariak zoriontzea besterik ez zait gelditzen”.
