Neguko merkealdian, Oiartzunen, euskaraz
Ttur-ttur Euskaltzaleon Bilguneak eta Oiartzungo Udalak hitzarmena dute merkataritzan eta ostalaritzan euskararen erabilera areagotzeko bidean. Horren harira, neguko merkealdian erosketak euskaraz egiteko, eta dendariek euren oharrak eta errotuluak euskaraz izateko, erraztasunak prestatu dituzte, eta horien berri emateko gutuna bidali diete sektore horretako beharginei. Bertan agertzen da zein zerbitzu dituzten eskura; denak doan dira —merkealdi aroan ez ezik, urte osoan balia ditzakete zerbitzu horiek—.
Asmoaren sustatzaileek esan dute, oraindik komertzianteren batek ez badu informazioaren berri ematen duen gutuna, zerbitzuen eskaera egiteko aukera badagoela. Hortaz, horren berri jakin nahi dutenek Fermiñene Etxera joan behar dute, Ttur-tturren egoitzara, edo 943 26 01 82 telefono zenbakira ere dei dezakete. Posta elektronikoz ere bidal daitezke eskaerak.
Merkealdia, Eskaintzak, Lehen/Orain kartelak; beherapena ehunekotan; baleak egiteko talonarioak; edo fakturak edo albaranak euskaraz eska ditzakete merkatariek.
