Hondarribiak hiru puntuak baino ez ditu nahi Ketaren aurkako lehian
Hondarribia Futbol Elkartearen lehen taldeak hiru puntuak lortu nahi ditu gaur Getariako Ketaren kontra 15:30ean Hondartzan jokatuko duen partidan. Ohorezko Mailako hamalaugarren denboraldiko partida izango da eta, irabaziz gero, berdeek jauzi handia egin lezakete sailkapenean. Azken bi partidetan puntu bakarra lortuta, zazpigarren posturaino jaitsi dira, baina hirugarren postua hiru puntura dute.
Hondarribiak 20 puntu ditu, Real Unionek, Antzuolak eta Ostadarrek bezala. Eta 23 punturekin Tolosa eta Aurrera daude. Talde horietatik guztietatik Hondarribiak du partida erosoena. Egia da ezin dela esan maila honetan partida erosorik dagoenik, baina egia da ere Hondarribiak etxean jokatzen duela sailkapenaren erdialdetik beherago dagoen talde baten kontra.
Hondarribia da faborito
Liga hasi zenetik kanpoan jokatutako sei partidetatik bakarra irabazi du Ketak, lehen jardunaldian Lagun Onaken kontra. Irunen berdindu zuten getariarrek eta gainontzeko lautan galdu zuten. Joan den asteburuan ere galdu zuen Getariako taldeak, etxean, burua altxatzen hasi zen Hernaniren kontra. Hondarribiak, aldiz, partida bakarra galdu du etxean, hain zuzen ere duela bi aste Anaitasuna koliderraren aurka jokatutakoa.
Horiek guztiak baliatu nahi ditu Hondarribiak gaur partida ona egin eta hiru puntuak Hondartzan geratu daitezen. Eta horretarako garrantzitsua izango da zaleen berotasuna. Mikel Llorente berdeen entrenatzaileak esan izan duenez, “neguan gogorra egiten da hirurak eta erdetan jokatzea harmaila hutsik badago”. Izan ere, klubean badakite ez dela ordu ona zaleentzat, baina futbol zelaiak ez du argi azpiegiturarik eta, neguan, ezin da beste ordu batean jokatu.
