‘Gabo’-k idatzi ezin izan zuen liburua
Nire arrebak eman zidan arrastoa, nik ez nekin ezer, baina Operación ogro liburua, euskal gatazkak inoiz eman duen kazetaritza lanik inportanteena dudarik gabe, Gabriel Garcia Marquez idazle kolonbiarrak (Nobel saria irabazitakoak) idatzi nahi izan zuen liburua izan zen. LANDER GARRO
Nire arrebak eman zidan arrastoa, nik ez nekin ezer, baina Operación ogro liburua, euskal gatazkak inoiz eman duen kazetaritza lanik inportanteena dudarik gabe, Gabriel Garcia Marquez Gabo idazle kolonbiarrak (Nobel saria irabazitakoak) idatzi nahi izan zuen liburua izan zen. Istorioa Ramon Chao kazetari eta nobelagileak kontatu du.
Garcia Marquezen asmoa, Carrero Blanco almirantearen kontrako ekintzaren ezagutza izan orduko, ekintzaileak elkarrizketatu eta liburua osatzea izan zen. Parisen Chao-rekin harremanetan jarri zen, eta ETAkideak Venezuelan elkarrizketatzeko nahia azaldu zion: “Hiru astez elkarrizketatuko ditut, haiek ekintzaren nondik norakoak minutuz minutu konta diezadaten; ideia sortu zen unetik bertatik, baten batek botoiari sakatu zion arterainokoa”, esan omen zion. Horretarako behar zuen gauza bakarra ETArekin harrematetan jartzea zen. André Aubri apaizarekin harremanetan jarri zen Chao, eta hark eman zion erakundearekin mintzatzeko bidea.
Hainbat aste eman zituen idazleak zain, eta, Chaok berak kontatzen duenez, aste haietan era guztietako mehatxuak jasan behar izan zituen, poliziak, ordurako, asmoaren berri zeukalako. Parisen bertan lortu zuen ostera Garcia Marquezek ekintzaileekin hitz egitea, eta hantxe azaldu zien bere asmoa. Hauek, arretaz entzun zituzten idazlearen hitzak, eta, amaituta, esan zioten: “Liburua idatzita dago, Gabriel, lasai horregatik; baina aurkez iezaguzu editoreren bat”.
Chaorengana jo zuen Gabo-k berehala, eta honek, Jean Lacouturerekin harremanetan jarri zuen, Le Seuil argitaletxekoa. Eta horrelaxe eman zuten liburua argitara, Frantzian eta Espainian bietan ia aldi berean, Garcia Marquez eta haien lagunen “laguntzari” esker. Ez dut istorioa hala gertatu ote zen egiaztatzerik izan, baina, istorio bezala, ez iezadazue esan ia liburuaren beraren misterioaren mailan ez dagoenik.
Lander Garro. Kazetari eta idazlea
