Hondakinen arloan adostasunaren alde egin du Mendozak
Ingurumen Kontseiluaren barruko Hondakinen Taldearen eskaerei erantzunez, hondakinen mahai bat osatuko dute udal talde politikoek eta Hondakinen Taldeak. Lehenengo bilera hilaren 16an egingo dute, 19:30ean, udaletxean.
Ingurumen Kontseiluaren barruko Hondakinen Taldearen eskaerei erantzunez, hondakinen mahai bat osatuko dute udal talde politikoek eta Hondakinen Taldeak. Lehenengo bilera hilaren 16an egingo dute, 19:30ean, udaletxean. Horren berri eman dute Jose Manuel Ferradas Ingurumen zinegotziak eta Julen Mendoza alkateak.
Mendozaren arabera, alde guztien artean “adostasuna” lortzea da helburua, eta “konfrontazio eta banaketa espazioak gainditu” behar direla esan du. Zentzu horretan, Hondakinen Taldearen dokumentua helburu hori lortzeko “oinarri ona” izan daitekeela uste du, batik bat honako gaiei heltzeko: “Zein helburu ezarriko ditugu herri bezala hondakinak biltzeari begira etorkizunean, nola aurre egingo diegu hondakinei lotutako hainbat gairi (birziklatzea, berrerabiltzea, gai organikoarekin konpostajea, kontzientziatze kanpainak…), eta nola bilduko dugu Errenteria sortzen ditugun hondakinak?”.
Alkateak aurreratu duenez, dagoeneko hitz egin dute Hondakinen Taldearekin bilera horri buruz, eta talde politikoei ere zabaldu diete deialdia.
Mendozak onartu du polemika handia sortu dela Gipuzkoa mailan, baina hori kontestualizatzen jakin behar dela gaineratu du. Gaiaren garrantzia kontuan hartuta, hala ere, Errenteriako Udalak, “erantzun bat” eman behar diola zehaztu du, “ez baita iraunkorra hondakin kopuru hori produzitzen jarraitzea”.
Lanaren aitortza
Mendoza nahiz Ferradasek Hondakinen Taldeak egindako lana aitortu dute, eta puntu batzuetan ados ez daudela onartu arren, “positiboki” baloratu dute. Lan horren emaitza izan da dokumentua, eta bertan biltzen diren zenbait proposamen mahai gainean jarri dituztela esan du Ferradasek, baina zehaztu du horietako batzuk Ingurumen Sailaren esku daudela, besteak, ordea, udalbatzarrera eraman beharrekoak direla.
Ingurumen Sailak proposamen horien ildotik hainbat neurri martxan jarri dituela jakinarazi du, eta horren adibide gisa jarri ditu urtarrilean martxan jarrita edukitzea espero dute auzo konpostajea, eta hondakinen prebentziorako plana kontratatu eta egitea “balioko duena, besteak beste, hondakinak biltzeko egungo ordenantza eguneratzeko”.
