Kopagoaren kontra 43.600 sinadura bildu dituzte
Duintasunak deituta, hileroko mobilizazioa egin dute gaur goizean pentsiodunek batez ere botiken ordainketa partekatua edo kopagoaren kontra, baita pentsioetan egiten ari diren murrizketak direla eta, euren eros ahalmena txikitzearen kontra ere. Dozenaka lagun elkartu dira gaur goizean Herriko Plazan, eta ordezkari gehiago izan dira, bat egin baitute Pasai Antxo, Hondarribia eta Irungo Kateako zaharren egoitzek ere: “Oarso Bidasoko eskualdeko zaharren egoitza guztiak lortu ditugu, Irungoak izan ezik”.
Gaurko mobilizazioan hainbat gai ukitu dituzte. Batetik, Gasteizen egin dituzten ekintzen berri eman dute. Azaroaren 21ean kopagoaren kontra bildutako sinadurak entregatu zituzten. Guztira, 43.600 izan direla jakinarazi dute; hasieran esperotakoa baino nabarmen gehiago, 15.000 sinadurako helburua baitzuten. Azaroaren 25ean, berriz, Eusko Jaurlaritzako Osasun eta Kontsumo Batzordearekin elkartu ziren, eta han, PP, PSE-EE, EAJ eta EH Bilduko ordezkariei euren kexak, kezkak eta eskaerak egin zizkietela adierazi dute.
Horri lotuta, udaletxeetan kopagoaren kontrako mozioak sartzen jarraitzen dutela azaldu dute, eta Pasaian euren eskaerak aho batez onartu dituztela.
Bestetik, hilaren 19an (osteguna) lurralde mailako manifestazioa egingo dutela aurreratu dute; Donostiako Bulebarretik aterako da 11:00etan.
“Borrokak balio izan du “
Gaurko mobilizazioan ere Eusko Jaurlaritza kopagoren eragina murrizteko onartzekoa den 18 milioi euroko laguntzaren berri eman dute. Hala, Duintasunaren arabera, “borroka egiteak balio izan du”, eta gaineratu du: “Ezer ez egiteak ez du ezertarako balio, borroka eginez lortzen dira gauzak”.
Jarraian, laguntza horien xehetasunak eman dituzte. Izan ere, laguntza hori baliatu izango dutela jakinarazi dute 18.000 eurotik beherako errentak jasotzen dituztenek, besteak beste. “Farmazietan berdin berdin ordaindu beharko dute, baina sei hilabetean behin laguntza hori jasoko dute farmazian bertan. Horretarako, farmazietan aurki daitezkeen eskuorri batzuk bete beharko dira. Horrekin ez dute kopagoa kenduko, baizik eta laguntza sozial batzuk emango dituzte Madrilek errekurritzea saihesteko”. Oraindik “letra txikia” ez dakitela gaineratu dute, baina hilabete erdirako berri gehiago izatea espero dute.
Hala eta guztiz ere, gogorarazi dute Gizarte Segurantzatik kanpo geratu diren 417 botikengatik gehiago ordaindu behar dutela hilero kopagoarekin ordaintzen duten 8,44 euroak baino, eta horregatik neurri horrekin bukatzeko eskatu dute.