Portua eta Udalaren arteko "joko arauak" aldatu ezean "lehentasunak" birplanteatuko ditu gobernu taldeak
“Erakunde arteko begirunezko harremanak” ezinbestekotzat jotzen ditu Pasaiako Udaleko alkate Amaia Agirregabiriak, eta Portu Agintaritza eta Udalaren artean horiek lortu ezean portuaren eremuan egiteko dauden 5 milioi euroko inbertsioak beste hainbat proiektuetara bideratzea aztertuko dutela iragarri du alkateak.”Lehentasunak aldatzeko unea iritsi da. Pasaiak baditu behar gehiago”, esan du alkateak. Gauzak honela, lonjaren bigarren fasea, Ziriza edota toporako sarrerako lanak egiteko Aldundiarekin sinatutako hitzarmenean aurreikusitako partidak beste hainbat proiektuetara bideratzea adostu dezakete Udalean.
Portuaren eta Udalaren arteko harremana inoiz ez da erraza izan Pasaian. Harremanak normalizatzeko helburuarekin, eta Portu Agintaritza berria dagoela baliatuta, hitzarmen bat lortu nahian ibili da azken garaian gobernu taldeak, “joko zelaiaren arauak zeintzuk behar duten” zehazteko hitzarmena. Hitzarmen hori begira landutako adierazpenari Udalean ordezkaritza duten alderdi guztiek eman zioten babesa lehengo asteko bozeramaileen batzordean, baina EAJk azken orduan jarrera aldatu eta adierazpena plenoan onartzeko orduan abstenitu egin zen, gobernuak “informazio ezkutatu” diela argudiatuta. Gauzak honela, alkateak berriro deituko du bozeramaileen batzordea, “alderdi guztiek batera” nahi dituelako Udalaren eskumenen defentsan.
