Hutsuneak nabaritu ditu La Bacaladerak Erandion
Jokalari garrantzitsuak min hartuta ditu La Bacaladera Hondarribia eskubaloi taldeak eta hutsune horiek kalte egin zioten joan den asteburuan Erandion jokatutako partidan. Hala ere, eta entrenatzailearen aabera partida ona jokatu ez zuten arren, garaipena gertu izan zuten hondarribiarrek. Atsedenaldira aurretik joan ziren (9-10) eta bigarren zatiko 20. minutura arte markagailuan nagusi ziren. Baina Erandiok hobeto bukatu zuen partida eta gol bakarragatik galdu zuen Euskal Ligan ari den Hondarribiko taldeak (21-20).
Viki de la Haza entrenatzaileak onartu zuen jokalari batzuk faltan bota zituztela baina egindako akatsengatik galdu zutela: “Plantilla motza dugu eta Jon Romo eta, batez ere, Eneko Sagarzazuren hutsuneak nabaritzen ari dira, lehen lerroan hiru jokalari baino ez ditugulako. Partida osoan arazoak izan genituen golak egiteko, Erandioko atezainak sei metroko jaurtiketa asko gelditu zituelako. Gainera, baloi asko galdu genituen, gehiegi partida irabazi ahal izateko”.
Andoni Ventura izan zen Hondarribiarren goleatzaile onena joan den asteburuan, Erandioren aurka, bost golekin.
La Bacaladera Hondarribiako golegileak: Ion Berges (2), Gorka Wanba (2), Unai Tello (1), Iñigo Gomez (2), Iñigo Amezketa (2), Mikel Vazquez (2), Erik Jimenez (3), Ander Lozano (1) eta Andoni Ventura (5).