Sebastian Salaberriari omenaldia, gaur, 28. Aste Musiko Koralean
Gaur abiatuko da San Pedron 28. Aste Musiko Korala. Asteburu honetan bi kontzertu egingo dituzte eta beste bi Gabonetan. Gaurko kontzertua, 20:00etan da, Pedro Deunaren elizan. Ondartxo Abesbatzak eta Sorginarri Txistu Taldeak eskainiko dute. Raimundo Sarriegi Etxeberriaren jaiotzaren mendeurrena dela eta, interpretatuko duten errepertorioa musikagile donostiarrarena izango dela iragarri dute antolatzaileek. Kontzertua bukatzerakoan berriz, Sebastian Salaberria Iparragirre Xebas omenduko dute. Kontzertua emango duten bi talderen sortzaileetakoa, lehengo maiatzean zendu zen.
Bihar, berriz, Julian Osa Arrillaga omenduko dute, 12:00etan, elizan bertan. Herriari egindako ekarpena eskertu asmoz, herriko norbait omentzen du urtero Ondartxok eta aurten San Pedroko traineruaren entrenatzailea izandakoa omenduko dute. Osa San Pedroko traineruaren entrenatzailea izan zen 1984 eta 1996 urteen artean. Tarte horretan, Kontxako lau bandera irabazi zituen San Pedrok. Larunbateko omenaldian, Ondartxo Abesbatzak Osaren bizitaren hainbat pasarte ekarriko ditu gogora, gaiarekin zerikusia duten abestiak kantatzearekin batera.
