Aldundiak egindako banaketatik Errenteria kaltetua atera dela iritzi dio PSE-EEk
Defizita malguago egitera zuzendutako 18 milioi euroko partida banatzerako garaian Bildu eta EAJk Gipuzkoako Foru Aldundian lortu duten akordioarekin ez dago ados Errenteriako PSE-EE. Hortik Errenteria kaltetua aterako diela iritzi dio Jose Angel Rodriguez Errenteriako PSE-EEko bozeramaileak, baita herritarren interesak ere. Zentzu horretan, bi alderdiek Errenteria “zigortzea” salatu du. 18 milioi euroko partidatik 6 milioi euro bideratuko direla udal inbertsioetara, eta Errenteriak 148.000 euro jasoko dituela jakinarazi du.
Eurek lortutako akordioarekin herri txikiei mesede egin eta handiak “eta karga gehiago dituztenak” kaltetzen direla uste du Rodriguezek. Gaineratu duenez, Udal Finantzazio Funtsak dagoeneko finantzatzeko berme bat ezartzen du 1.100 biztanletik beherako herrientzat.
PSE-EEren proposamena
PSE-EEk, haatik, “populazioaren araberako sistema progresiboa” ezartzen duen beste proposamen bat egin zuela azaldu du, eta horren arabera, Errenteriak jasoko dituen 148.000 euroren ordez, 353.000 euro jasoko lituzkeela.
PSE-EEren proposamena aurrera ez ateratzeaz ere kexatu da Rodriguez, eta horrek Toki Erregimenaren Oinarrizko Legea kontuan hartzen duela adierazi du. Alegia, herri handiek beregain hartzen dituzten gizarte zerbitzuak eta horrek ekartzen duen gastu publikoa. “Herri txikiek ez daude gizarte zerbitzuak ematera behartuak”.
Bildu eta EAJren proposamenaren arabera, ordea, Astigarragak (5.000 biztanle ditu) 16 euro biztanleko jaso dituela adierazi du PSE-EEko bozeramaileak, eta Errenteriak, berriz, 4 euro.
