130.000 euro gehiago Gizarte Larrialdietarako Laguntzetara
Errenteriako Udalak 130.000 euro gehiago zuzenduko ditu GLL Gizarte Larrialdietako Laguntzetara. 2013ko aurrekontuetan 114.293 euro aurreikusita zeuden, eta aipatu kopurua batu dio. Jon Txasko Gizarte Ongizateko zinegotziak azaldu duenez, krisi ekonomikoak eta iraupen luzeko langabezia egoerek GLL eskaera kopurua nabarmen handitu dute. Zehazki, 2011n baino %10 gehiago.
Txaskok gaineratu du maiatzerako ia kopurua agortuta zegoela. Zentzu horretan, Eusko Jaurlaritzari GLLetarako diru kopurua handitzeko eskatu dio. Izan ere, Eusko Jaurlaritzaren esku dago laguntza eskaeren finantzazioa, nahiz eta gero herriei dagokien horiek onartu, ezeztatu eta ordaintzea. Jaurlaritzak ezarritako kopurua 289.706,5 eurokoa izan da.
Baldintza “zorrotzegiak”
GLLren bidez, etxebizitzaren alokairu edo hipotekak, argiak, urak edo berogailuak sortutako gastuei aurre egiteko nahikoa baliabide ez duten herritarrei laguntzen zaie. Txaskok, ordea, salatu du Jaurlaritzak laguntza horiek emateko ezarritako baldintzak “zorrotzegiak” direla, eta ez dietela erantzuten familiek dituzten beharrei: “Hiru kide edo gehiagok osatutako familia batean, adibidez, konputagarriak diren diru sarrera guztiak 875,19 eta 1.297,5 euroren artean egotea eskatzen dute hilabetean, eta gehienez, alokairu edo hipotekarako 250 euro kobratu ahal izango dituztela hilabetean”.
Gaineratu duenez, 2011n beste muga bat ere jarri zuen, eta horren arabera, ezingo dituzte hamabi sari baino gehiago jaso, “nahiz eta beren egoera sozio ekonomikoa eta etxebizitzaren truke ordaintzeko kopurua bera izan, edo are gehiago, kasu batzuetan larriagoa izan”. Zentzu horretan, muga hori ere kentzeko eskatu dio Jaurlaritzari Txaskok.
