OHZ izoztea proposatu du Errenteriako udal gobernu taldeak
Datorren urteari begirako ordenantza fiskalak prestatzen ari da Errenteriako udal gobernu taldea, eta krisi egoera honetan familiek egin behar duten “ahalegin berezia” kontuan hartuta, OHZ Ondasun Higiezinen Zerga izoztea proposatu duela jakinarazi du, “nahiz eta jakin neurri horrek diru sarrera gutxiago izatea ekarriko duela”. Gainontzeko tasa eta zergei dagokionez KPIaren araberako igoera ezartzeko asmoa azaldu du: %2,2.
Hutsik dauden etxebizitzei gainkarga ezartzen jarraituko dutela gaineratu du udal gobernu taldeak. Iaz hasi ziren gainkarga hori ezartzen. Hala eta guztiz ere, iazko neurriari lau salbuespen berri gaineratuko dietela zehaztu du, “egoera bidegaberik ez sortzeko”. Hala ere, ez du zehaztu horiek zeintzuk izango diren.
Beste neurriak
Jarduera ekonomikoa sustatzeko zenbait neurri fiskal ere hartzea pentsatzen ari da udala iazkoez gain: lokalak merkataritza jardueretara bideratzeko berritze eta egokitze lanen hobaria %33tik %50era igotzea.
Ingurumen hobariak sustatzea ere aztertzen ari dela gaineratu du, eta bi berri izango direla: energia berriztagarrien erabilera eta langileen garraiorako planak.
Azkenik, ur tarifaren kalkuluan aldaketak izango direla aurreratu du: “Kuota bakarraren araberako tarifikaziotik kontsumitutako metro kubikoen araberako tarifikaziora pasatuko da, kontsumo eta tarifaren arteko erlazio zuzena ezarriz”.