Jaien inguruan egitarau zabala antolatu dute Betharramen
Caser Betharram egoitzan egitarau oparoa antolatu dute Hondarribiko Jaien inguruan. Gaur herrira irten dira egoitzako egoiliarrak, jaien aurreko giroaz bustitzeko, baina ekitaldi gehienak Mendelu auzoko zaharren egoitzan bertan izango dituzte. Besteak beste, haurren marazketa lehiaketa egingo dute hilaren 4an alardea ikusiko dute telebistaz, baita Kontxako estropadako bigarren jardunaldia ere.
Asteazkenean hasi ziren ekitaldiak Betharramen, brotxe tailerrarekin. Ostegunean alardeko konpainia batek entsegua egin zuen egoitzako pasabideetan eta larunbatean alardea ospatu zuten bertan, Gibeletako parkeko sarrera berrian abiatuta. Asteburua biribiltzeko, musika aktuazio bat izan zuten Betharrameko egoiliarrek atzo, igandearekin.
Alardea eta estropadak, telebistaz
Baina ekitaldi gehienak aste honetarako utzi dituzte. Bihar, esaterako, Meaka Dantza Taldeko dantzariek emanaldia eskainiko dute Mendeluko zentroan, 17:30ean. Asteazkenean, berriz, 6-12 urtetik haurrei irekiko dizkiete Betharrameko ateak, haurren pintura lehiaketarako. Goizeko hamaiketan hasiko da lehiaketa eta sarien banaketa arratsaldean izango da, txokolatadarekin.
Igandean, alarde egunean, telebistaren aurrean emango dute goiza egoitzan geratzen direnek. Eraikineko hainbat aretotan jarriko dute telebista eta desfilea ikusi nahi ez duenak, estropadak jarraitzeko aukera izango du, bi ekitaldiak emango baitituzte. Egun horretan, hilaren 8an, jaietako bazkari berezia egingo dute Betharramen.
Hilaren 10ean, aldiz, adinekoen bazkaria egingo dute Ardora jatetxean eta bertara hurbilduko dira Caser Betharrametik ere. Udalak antolatzen du urtero adinekoen bazkaria eta gaur banatu dituzte txartelak.
